Hz. Adəmin Allah dərgahında qurbanı qəbul edilməyən oğlu Qabil qurbanı qəbul edilən qardaşı Habili qısqanclıq zəminində qətlə yetirir. Bu, bəşər tarixində ilk qətl hadisəsidir. Qurani-Kərim bu barədə deyir: “Nəfsi Qabili qardaşını öldürməyə sövq etdi, onu öldürdü və ziyana uğrayanlardan oldu” (5/30). Peşman olan Qabil ölmüş qardaşının cəsədi ilə nə edəcəyini bilmirdi. Bu, bəşər tarixində həm də ilk insan ölümü idi. Qabil, yeri eşib ölmüş həmcinsini torpağa quylayan qarğadan nümunə götürür və qardaşını dəfn edir. Qurani-Kərim olayı belə təsvir edir: “Allah qardaşının cəsədini necə basdırmağı ona göstərmək üçün yer eşən bir qarğa göndərdi. Qabil dedi: “Vay halıma! Bir qarğa qədər olub qardaşımın cəsədini basdıra bilmərəm?” (5/31).
Bəli, ibrət almağımız üçün dünyada və kainatda saysız-hesabsız əlamətlər var. Bəşər övladı, təəssüf ki, çox vaxt bunlardan bəhrələnmir.
Bu gün ölkəmizdə Qabillər nəfsani istəklərinə uyub mal-dövlət hərisliyi, korrupsiya, rüşvət, oğurluq və talançılıq zəminində Habilləri yaralayır, onların haqqını yeyir və ya qətl edirlər.
Təəssüf ki, XXI əsrdə cahilliyin Qabil dönəmini yaşayırıq. Aparıcı bir dəb düşüb: "Uşağına gün ağla!" Nədir bu "uşağına gün ağla"? Cavab:
"Əlinə vəzifə, fürsət keçdimi, dayanma, rola gir, iş görüntüsü yarat, mədhiyyələr söylə, sonra saxtakarlıq et, çap, tala, aldat, rüşvət al, milli maraqları sat və s., yaxud rüşvət vermək üçün ək, becər, dana saxla, qoyun otar, onu da bacarmırsansa, get Rusyetə, Türkiyəyə, killer ol, oğurluq elə, əlinə pul dolaşdır, gəl puldan bas, uşağını qoy ədəbli universitetlərin nüfuzlu fakültələrindən birinə, qurtarsın, yenə puldan bas, keçir vəzifəyə, pul yığsın, verib keçsin tərbiyəli və möhtərəm rektor vəzifəsinə, həyatı gözəl görən məsum tələbələrin sevgisini qazansın, ağlatsın bu millətin anasını. Bəs necə? Uşağına gün ağlamalısan, ya yox?! İstərsən uşağına şərab zavodu açdırarsan, istərsən Kataloniyada Anitaların ağuşunda 2-3 milyonluq saat kolleksiyaları düzəltdirərsən. Bəs necə, uşağına gün ağla!"
Əfsus! Belə xəstə təfəkkür tərzi hakimdir! Allahın bir xalq kimi bizə verdiyi fürsəti dəyərləndirə bilmədik. Ölkənin gəlirlərini dağıtdıq, nəhəng vergilərdən yayındıq, ayrılan milyon və milyardları mənimsədik, dövlətin büdcəsini viran qoyduq. Bununla, özümüzün də, "gün ağladığımız" uşaqlarımızın da başına yekə bir daş saldıq, amma fərqinə varmadıq!
Ey ibtidai təfəkkürlü, heyvan xislətli bədbəxt məxluq! Müasir dünyada uşağına gün ağlamaq istəyirsənsə, hüquqi dövlətin oturuşmasına, onun zəngin, sarsılmaz olmasına çalış, dövlət büdcəsinə əl uzatma, onu göz bəbəyi kimi qoru ki, o da səni və övladlarını qorusun!
Sarsılmaz dövləti olmayan vətəndaşın milyardları da olsa, sonda özü də, pulu da qurd-quşa yem olacaq. Məsələn, Rövnəq Abdullayevin oğlu 2 milyonluq saatı oğurladır, bankirin arvadı Zamirə Hacıyeva London küçələrində Azərbaycan xalqından oğurladığı milyonlar cibində o marketdə, bu məhkəmədə, künc-dalanda oğru qismində saxlanılır, alçaldılır, əri türmədə, özü küçədə. "N" qədərdir belə nümunələr və bundan da pisləri. Lənət qabına çevriliblər. Pis olan odur ki, özləri cəhənnəm, bir dövlət, bir xalq bu yaramazların əməllərindən əziyyət çəkir.
Vaxtında tədbir görülsəydi, onları da, xalqın və dövlətin maraqlarını da xilas etmək olardı. Birinin övladı qızıldan olan unitazını götürüb Amerikaya qaçır, başqa vəzifəlilər dünya ölkələrində milyardlıq villalar salır, saunalar, basseynlər düzəldir, bir sözlə, ölkəni dağıdır, xalqın varidatını viran edirlər. Bəşər adına ləkə olan bu məxluqların sayı çox, fəaliyyət miqyasları genişdir.
Əslində, müvafiq qanun qəbul edib bu qəbildən olan insanlıq düşmənlərini güllələmək, yaxud edam hökmü ilə zərərsizləşdirmək ən effektli yol olardı. Əks təqdirdə, onlar insanlıq adına olan bütün dəyərləri məhv edəcəklər. Millətin faciəsi çəyirtkə sürüsü kimi insanlıq üzərinə şığıyan bu canlıların fəaliyyəti ilə bağlı deyildirmi?! Erməni quldurları 44 gün ərzində zərərsizləşdirildilərsə, bütöv bir milləti və dövləti hədəf almış daxili banditlərin zəzərsizləşdirilməsi daha çox vaxt tələb edir.
Dövlətinə yox, "uşağına gün ağla"nın acı aqibəti budur. Halbuki uşağını düşününən kəs ilk növbədə dövlətini düşünər. Görünən odur ki, bu ziyanvericilər heç vaxt özlərini və uşaqlarını düşünə bilməyiblər, çünki dövləti talan edib ciblərinə yığmaqla əbədi xəyanət ediblər. Bunu yalnız düşmən edə bilər. İbrət götürənlər isə çox azdır. Bəlkə də, adekvat cəzanın olmaması buna rəvac verir.
PS. Əgər bu kütləvi məhvetmə şəbəkəsinə qarşı səfərbər olunmasaq, inanın ki, ölkə əldən gedə bilər. Bu iş tək bir nəfərin işi deyil, yəni Prezidentin Sərəncam verib işdən azad etməsi ilə iş bitmir və təhlükə sovuşmur. Hər kəs vətəndaşlıq borcunu yerinə yetirməlidir.

İdris Abbasov
filologiya elmləri doktoru, professor

Sən demə, İsa Həbibbəylinin aylıq maaşaı 8 976 (səkkiz min doqquz yüz yetmiş altı) manat 25 qəpikdir. İl ərzində bundan əlavə 8 min 662 (səkkiz min altı yüz altmış iki) manat 20 qəpik müavinət də alır.
BÜDCƏDƏN QİDALANIRLAR, AMMA PROBLEMLƏRİN ÖLKƏ PREZİDENTİNƏ AİD OLDUĞUNU DEYİRLƏR. ORTADA YEYİB QIRAQDA GƏZƏN ADAMA AKADEMİK-DEPUTAT DEYİLİR? BU QƏDƏR DÖVLƏT ƏHƏMİYYƏTLİ MƏSƏLƏLƏRİN ONA AİD OLMADIĞINI DEYİR. AKADEMİK FƏLAKƏTDİRMİ BU?
Əziz dostlar, Prezidentin Dilçilik İnstitutuna ayırdığı və yoxa çıxan 2 milyon manatın ona heç bir aidiyyətinin olmadığını deyən, özünün və adamlarının zəif, hətta primitiv plagiat əsərlərini dövlət vəsaiti hesabına nəşr etdirib "şedevr" kimi təqdim edən, Prezident İlham Əliyevin Sərəncamı ilə ana dilmizə aid qədim fondlarda saxlanılan əsərlərin araşdırılması və çapına 1 manat da ayırmayan, öz elmlər doktoru həmkarının kasıbçılığına sevinən, ədalətsizlikdən xüsusi zövq alan, alimliklə tərs mütənasib olan təfəkkür tərzinə (Mənə nə? Ölkənin Prezidenti var, etsin də!) sahib, 2017-ci ildə Mirzə Kazımbəyin "Türk-tatar dilinin ümumi qrammatikası"nın (Azərbaycan dilinin ilk elmi qrammatikası, 1007 səh.) və 2020-ci ildə Pietro della Vallenin "Türk dilinin qrammatikası" (Azərbaycan dilinin orijinal qrammatikası 1096 səh.)nın tərcümə, tədqiq və şərhinin çapına heç bir vəsait ayırmayan (halbuki Prezident 2 000 000 manatı bu işlər üçün nəzərdə tutmuşdur), AMEA-nın müvafiq elm sahəsini kurasiya edən vitse-prezidenti, Milli Məclisin deputatı, AMEA-nın Nizami adına Ədəbiyyat İnstitutunun direktoru, akademik İsa Həbibbəylinin, sən demə, təkcə dövlətdən aldığı aylıq məvacibin məbləği ən azı 8 976 (səkkiz min doqquz yüz yetmiş altı) manat 25 qəpikdir. İl ərzində bundan əlavə 8 min 662 manat 20 qəpik müavinət də alır. Bunu da aylara böldükdə, təxminən 9 min 700 manat edir.
Müqayisə edin:
İsa Həbibbəyli 9700 mant - İdris Abbasov 550 manat. Bu böyüklükdə "ƏDALƏT" olarmı?! Gəlin, xidmətimizi də, ziyanımızı da qoyaq ortaya!
Dövlətə, millətə, elmə sevginiz bu qədər bəsitdirmi, möhtərəm akademiklər? Bu qədər "qayğıkeş" və elm "təəssübkeşi"sinizmi? Milyonlarla ayırmaları, qrantları göyə sovurmanızı demirəm, hələ rəsmi aldığınız bu qədər maaş müqabilində elmin başına oyun açmaqdan xəcalət çəkmirsinizmi?! İnstitut direktoru Möhsün Nağısoylunun adını çəkmirəm, çünki o, özünün də etiraf etdiyi kimi sizin buyuruğunuzu yerinə yetirir, heç bir funksiyası yoxdur. AMEA prezidenti Ramiz Mehdiyevin də belə taleyüklü işlərə baş qoşmağa vaxtı və halı yoxdur.
Möhtərəm İsa Həbibbəyli, vallah, belə davam etmək olmaz.
Elan vurmusunuz ki, 21 fevralda "Beynəlxalq Ana dili Günü"nə həsr olunmuş tədbir keçirəcəksiniz. Nə dərəcədə səmimidir? Axı siz ana dilimizin ilk elmi qrammatikasına və 400 il əvvəl yazılmış tarixi-siyasi və dövlətçilik əhəmiyyətinə malik milli abidəmizin dirçəldilməsinə məhəl qoymadınız, pulları basıb-yediniz, çünki şəxsi və tayfa-tülə marağı güdməklə, özünüzə və şəxsinizə aid olanlara "gün ağlamaq"la məşğul olmusunuz! Baş redaktoru olduğunuz, nöqtəsinə, vergülünə kimi köçürülən 912 səhifəlik biabırçı plagiat kitaba gurultulu tədbirlər və təqdimat mərasimləri keçirdiniz. Üstü açıldı, rüsvay oldunuz, amma yenə də yolunuzdan dönmədiniz.
Dövlətə xidməti 20 nəfər elmlər doktorunun aylıq maaşı mislində maaş alıb, geniş səlahiyyətlərə, maddi imkanlara malik olub belə yarıtmaz işlərlə məşğul olmaq kimi başa düşürsünüzmü? Yəni dövlət maraqları ilə bağlı sizin heç bir məsuliyyətiniz yoxdurmu?!
Bu işinizlə sizin ayınıza mənim aldığım 550 manat da düşmür. Nə edək ki, hələlik çərxi-fələk belə dönür...
Deputat maaşı ilə bağlı bu linkdən oxuya bilərsiniz:
https://www.yeniavaz.com/.../milli-meclis-deputatlarin...

İdris Abbasov
filologiya elmləri doktoru, professor