Bu gün Azərbaycanın mühüm beynəlxalq nəqliyyat dəhlizlərinin funksionallıqlarının təmin olunmasında rolu getdikcə daha da artır. O cümlədən Şimal-Cənub və Şərq-Qərb Beynəlxalq Nəqliyyat Dəhlizləri üzərində yerləşən ölkəmiz sahib olduğu geosiyasi mövqeyinə görə bütün bu istiqamətlərdə həyata keçirilən beynəlxalq daşımaların ən önəmli tranzit qovşağı kimi çıxış edir. Xüsusilə Vətən müharibəsində əldə olunmuş tarixi Qələbədən sonra regionda yaranmış yeni reallıqların və bu zəmində açılan daha geniş iqtisadi əməkdaşlıq perspektivlərinin fonunda Azərbaycan Cənubi Qafqaz regionundan keçən bütün beynəlxalq logistik dəhlizlərin səmərəli istifadəsi baxımından əsas söz sahiblərindən birinə çevrilmişdir.

Təbii ki, sözügedən logistik dəhlizlərin əsas nəqliyyat növü məhz dəmir yolu nəqliyyatıdır. Buna görə də Azərbaycanda hal-hazırda dəmir yolu nəqliyyatının təkmilləşdirilməsi və inkişafı istiqamətində xüsusi tədbirlər həyata keçirilir. Ölkəmizdə dəmir yollarının inkişaf strategiyasında qənaət, xidmət keyfiyyətinin artırılması və mənfi ekoloji təsirin azaldılması kimi mühüm amillər nəzərdə tutulur. Yeri gəlmişkən, bir neçə gün bundan öncə, iyun ayının 27-də keçirilmiş “Azərbaycan Dəmir Yolları” QSC-nin Müşahidə Şurasının növbəti iclasında çıxış edən QSC-nin Müşahidə Şurasının sədri, nəqliyyat, rabitə və yüksək texnologiyalar naziri Rəşad Nəbiyev strategiyada əksini tapacaq investisiya qoyuluşu, rəqəmsal transformasiya, insan resursları sahəsində idarəetmənin təkmilləşdirilməsi, eləcə də dəmir yollarının beynəlxalq nəqliyyat sisteminə inteqrasiyası və digər məsələlərlə bağlı mühüm rəy və təkliflərini bildirib. Həmçinin QSC-nin sədri Cavid Qurbanov da həmin toplantıda çıxış edərək bildirib ki, dəmir yolu şəbəkəsinin inkişafı konseptual yanaşma tələb edir və buna görə də Korporativ Strategiya planında bütün istiqamətlər nəzərə alınıb.

Göründüyü kimi, bu sahədə dinamik inkişafın təmin olunması məqsədilə dövlətimiz tərəfindən qarşıya qoyulmuş vəzifələrin vaxtında və səmərəli icrası üçün “Azərbaycan Dəmir Yolları” QSC-nin rəhbərliyi bütün resurs və potensialları səfərbər etməkdədir. Lakin çox təəssüf olsun ki, bəzən bir struktur bölmə rəhbərinin məsuliyyətsizliyi və yaxud da yol verdiyi daha ciddi qanun pozuntusu faktı nəhəng bir qurumun çoxşaxəli və səmərəli fəaliyyətinə kölgə sala bilir. Bu günlərdə İmişli Dəmir Yolu Sahəsinin rəisi Təvəkkül bəyin yol verdiyi qanun pozuntusu da belə əməllərdəndir.