Şəxsi düşüncələrinə əsaslanaraq qanunyaratma təkcə Azərbaycan Milli Elmlər Akademiyasının Rəyasət Heyətində baş vermir. Bu hal Ali Attestasia Komissiyasının Rəyasət Heyətində daha “taktik”dir. (Komissiyanın tətbiq etdiyi qeyri-qanuni "taktikalar"ı, adətən, düşmənə qarşı edirlər). Bundan məqsəd vətəndaşları mənəvi-psixoloji cəhətdən yorub dövlətdən və ilk növbədə ölkə başçısından narazı salmaqdır. Bunun başqa adı yoxdur.
AAK SƏDRİ FAMİL MUSTAFAYEVİN DƏ DAXİL OLDUĞU AKADEMİK ŞƏBƏKƏNİN SANKİ XÜSUSİ QANUNVERİCİ ORQANI VAR.
Xatırladım ki, Famil Mustafayevin AAK-a sədr gəldikdən sonra qanunsuz əməlindən əl çəkməməsi 50-yə yaxın doktorant və dissertantın ölkə başçısına müraciəti ilə nəticələnmişdir. Bundan sonra da o, qeyri-qanuni əməlində korrektə etməmiş, əksinə, daha da rüsvayçı addım ataraq məlum 4 bəndlik qərarın (13 dekabr 2019-cu il) ilk iki bəndini dəyişib növbəti iki bəndini olduğu kimi saxlamış, qanunu tələb edən doktorantlar arasında ikitirəlik yaratmağa çalışmışdır. Necə deyərlər, qaş düzəltdiyi yerdə vurub gözünü də çıxarmışdır.
Ali Attestasiya Komissiyası "lehinə-əleyhinə" taktikasına sadiqdir. Bu gün qərar çıxarıb lehinə səs verdiyi qərarın sabah əleyhinə səs verib qeyri-qanuni sayan AAK-ın birisi gün nə edəcəyini Allah bilir. Əlbəttə, dəyən ona və onun kimi ortada yeyib qıraqda gəzən vəzifə adamlarına yox, Azərbaycan dövlətinə, xalqına və rəhbərinə dəyir.
Yaxınları səngərdə düşmənlə döyüşdüyü bir vaxtda AAK həmin döyüşçülərin qanunu tələb edən, haqlarını istəyən yaxınları ilə – potensial əsgər anaları ilə "döyüşür". Qürurvericidir, deyilmi?! Heyhat!
Söhbət AAK sədrinin qanunsuz əməllərindən, işbilməməzliyindən və özbaşınalığından gedir. Adam Konstitusiyanın maddəsini öz şəxsi düşüncəsinə görə pozur, Azərbycan Konstitusiyasının müvafiq maddəsinin ziddinə qanunsuz qərar çıxarır, bir müddət sonra həmin qərarın bir hissəsini öz şəxsi zövqünə uyğun dəyişib bir hissəsini saxlayır - eynən AMEA Rəyasət Heyətinin etdiyi və ya onun etdiyinin bənzəri kimi edir.
AAK-dakı, onun Rəyasət Heyətindəki və ekspert şuralarındakı qanunsuzluqlardan, özbaşınalıqlardan, Famil Mustafayevin işbilməzliyindən çox yazılıb. Dərd burasıdır ki, AAK sədri özbaşınalıqların baş alıb getdiyi dissertasiya şuralarında intizam yaratmaq əvəzinə, həmin şuralardan öz qanunsuz hərəkətlərinə dəstək ummaq həvəsilə fəaliyyət göstərir.
P.S. Xatırladım ki, F.Mustafayevin səhv və qanunsuz qərarının qurbanlarından birinə çevrilmiş, həyat yoldaşı Hadrut uğrunda gedən döyüşlərdə yaralanmış xanım dissertant seçdiyi elm sahəsindən savayı, Konstitusiya və qanunları Famil Mustafayevdən daha yaxşı analiz etmək qabiliyyətinə sahibdir. Belə layiqli Vətən övladlarını tam haqsız olaraq bezikdirib narazı salmağa çalışanların nəinki vəzifə tutmağa, həmçinin özlərinin və cəmiyyətə xeyri olmayan övladlarının Vətənin naz-nemətlərini inhisara alıb lüks şəraitlərdə yaşamağa, bahalı avtomobillərdə saga-sola çapmağa, xalqa acıq-qıcıq verib ölkəni parçalamağa, elmsizləşdirmək bir tərəfə qalsın, cəmiyyəti əxlaqsızlaşdırmağa, kin-küdurət yaradıb məhv etməyə haqqı yoxdur. Yetər artıq!
Qeyd. Mən növbəti statusda vəzifəsindən sui-istifadə edib vətəndaşları girinc edən möhtərəm Famil Mustafayevin 2010-cu ildə müdafiə etdiyi elmlər doktorluğu dissertasiyasının avtoreferatını təqdim edəcəyəm. Ürəyi və əsəbi zəif olanların baxması məsləhət deyil. Orta savadlı könüllü bir iqtisadçı istəyərsə, cənab-alinin dissertasiyasını da birgə nəzərdən keçirə bilərik. Əlbəttə, elmin başında dayanan şəxslərdən öyrənmək qəbahət deyil!

İdris Abbasov
filologiya elmləri doktoru, professor